CIC nanoGUNE-k Maria de Maeztu Bikaintasun Unitatea saria jaso du hirugarren aldiz jarraian
CIC nanoGUNE-k hirugarren aldiz jarraian eskuratu du Maria de Maeztu Bikaintasun Unitatea saria, Valentziako Unibertsitate Politeknikoko Kubo Urdinaren Auditorioan egindako jarduera instituzional batean; Zientzia, Berrikuntza eta Unibertsitate Ministerioak antolatu du ekitaldia, 2025eko ekitaldian saritutako ikerketa-zentro eta -unitateak aintzatesteko. nanoGUNE ordezkatuz izan ziren han José María Pitarke zuzendari nagusia eta Luis Hueso ikertzaile nagusia, zeinak zentroa nanozientziaren eta nanoteknologiaren nazioarteko erreferente gisa aintzatesten duen saria jaso baitu.
Espainiako Zientzia, Berrikuntza eta Unibertsitate Ministerioak ematen du saria, Estatuko Ikerketa Agentziaren bidez (AEI). Espainiako bikaintasun zientifikoaren bandera-ontzia den Severo Ochoa eta Maria de Maeztu Bikaintasun Programaren parte da, zeinak aintzatesten baititu lidergo zientifiko bikaina, nazioarteko inpaktua eta ezagutzaren mugak zabaltzeko ikuspegi estrategiko sendoa erakusten duten ikerketa-zentro eta -unitateak. Posizionamendu zientifikoa eta instituzionala berresteaz gainera, sariak 2,25 milioiko dirulaguntza bat ematen du lau urterako, bikaintasun-ikerketa, talentua erakartzea, nazioartekotzea eta ezagutzaren transferentzia indartzen dituzten jarduketa estrategikoak bultzatzeko.
Saria hirugarren aldiz jarraian jasotzeak are gehiago azpimarratzen ditu nanoGUNE-ren errendimendu zientifikoaren sendotasuna, nazioarteko talentua erakarri eta prestatzeko duen ahalmena eta ikerketaren eta berrikuntzaren ekosistemari egiten dion ekarpena. Horrez gain, oinarrizko zientziaren eta etorkizuneko teknologien arteko interfazean erreferentziazko zentro gisa duen papera indartzen du.